പയ്യാമ്പലത്ത്‌ അപകടം പതിയിരിക്കുന്നു;
പയ്യാമ്പലത്ത്‌ അപകടം തുടര്‍ക്കഥയാകുമ്പോള്‍ അധികൃതര്‍ മൗനം പാലിക്കുന്നു. ബുധനാഴ്‌ച ചെറിയ പെരുന്നാളാഘോഷത്തിനെത്തിയ മട്ടന്നൂര്‍ ചാവശ്ശേരിയിലെ കുനിയില്‍ റിസ്‌വാനാ(15)ണ്‌ പയ്യാമ്പലത്തെ തിരകളുടെ അവസാന ഇര. കൂട്ടുകാരോടൊത്ത്‌ കുളിക്കാനിറങ്ങിയ റിസ്‌വാന്‍ തിരമാലകളില്‍ പെടുകയായിരുന്നു. ഇതിനു മുമ്പും പലതവണ അപകടങ്ങളും മരണങ്ങളും സംഭവിച്ചിരുന്നു. മുഴപ്പിലങ്ങാട്‌ തീരത്തില്‍ നിന്ന്‌ വ്യത്യസ്‌തമായി പയ്യാമ്പലത്ത്‌ ചുഴികളുണ്ടാകുന്നുണ്ട്‌. ഇതാണ്‌ അപകടമുണ്ടാക്കുന്നത്‌. അപകട സാധ്യത വിളിച്ചറിയിച്ചുള്ള ഒരു ബോര്‍ഡ്‌ ജില്ലാ ടൂറിസം പ്രമോഷന്‍ കൗണ്‍സില്‍ ഇവിടെ സ്ഥാപിച്ചിരുന്നെങ്കിലും ദ്രവിച്ചു പോയി. ഇപ്പോഴതിന്റെ കാല്‍ പോലുമില്ല. ആഘോഷ ദിവസങ്ങളില്‍ പോലും അപകട മുന്നറിയിപ്പ്‌ നല്‍കാന്‍ ഇവിടെ സംവിധാനങ്ങളില്ല. ലൈഫ്‌ ഗാര്‍ഡുകളുണ്ടെങ്കിലും കുളിക്കാനിറങ്ങുന്നവരെ നിയന്ത്രിക്കാനിവര്‍ക്കാകുന്നില്ല. ആഘോഷത്തിന്‌ മറ്റു സ്ഥലങ്ങളില്ലാത്തതിനാല്‍ ഓണം, പെരുന്നാള്‍, വിഷു തുടങ്ങിയ വിശേഷ ദിവസങ്ങളില്‍ നൂറുകണക്കിനാളുകളാണ്‌ ഇവിടെയെത്താറ്‌.
